Промоција на книгата за деца „Мачорот Тане“

Денес, во Лабораториум, со почеток во 17:00 часот, ќе биде промовирана книгата за деца „Мачорот Тане“.

Автор: Лина Димоска
Илустратор: Калиопи Трпчева
Промотор: Ана Голејшка Џикова

„Идејата за делото „Мачорот Тане“ се роди во една септемвриска квечерина, по предлог на мојот пријател. Патем, мачорот Тане дури и навистина постои. Тоа е мојот домашен мачор кој во една година живот помина низ еден куп згоди и незгоди. Издвојува битка против тешка болест, а со самото тоа ми покажа дека и животните го сакаат животот и себеси, исто како луѓето.“- Вели авторката на книгата Мачорот Тане.

Во својата рецензија Филип Димкоски ќе напише:
„Овие раскази се одлкуваат со едноставност во раскажувањето и со еден модерен и современ и наративен стил кој ѝ е допадлив на младата читателска публика. Секој расказ има свој наслов кој ни најавува на што ќе се однесува содржината или какво дејство ќе се одвива. И оваа книга со раскази како и секоја добра книга за деца успева да ги обедини забавното и едукативното, низ умесен и шармантен хумор кого децата особено го сакаат. Секој расказ завршува со некаков заклучок и поука кој несомнено ќе се втисне до детското срце и мозоче доколку се чита со внимание и со разбирање, па и со помош на родителот или наставникот доколку е потребно. Овие раскази дури и повикуваат на разговор по прочитувањето на секој одделно. Убаво би било да се препрочита заклучокот и родителот или наставникот да поразговара со детето околу содржината, заклучокот и поуките што можат да се извлечат, но и да се применуваат во секојдневието“.

Ова дело има за цел да ги поттикне децата да практикуваат позитивни и правилни форми на однесување. Да ги почитуваат различните од нив, да ги сакаат другарчињата, да ги слушаат и да не ги лажат своите родители, од најмали нозе да почнат да се грижат за околината и животните. Сега кога знаеме за каков херој се работи, да не ја пропуштиме промоцијата на која ќе зборуваме на долго и на широко за неговите мачешки неволји.