Шведската поп-група АББА побарала од Доналд Трамп да престане да ја пушта нивната музика и видеа на собирите на неговата кампања, соопшти денеска издавачот на АББА, пренесува Ројтерс.
Хитовите на АББА, вклучително и The Winner Takes It All, Money, Money, Money и Dancing Queen, беа свирени на митингот на Трамп на 27 јули во Минесота, заедно со видеа, објави шведскиот дневен весник Svenska Dagbladet, чиј известувач беше на тој настан.
„Заедно со членовите на АББА дознавме дека на митинзите на Трамп се пуштаат видеа од музиката на АББА и побаравме тоа веднаш да се прекине“, велат од Universal Music, со седиште во Холандија.
Издавачот истакна дека не ѝ дал дозвола на кампањата на Трамп да го стори тоа.
Членовите на бендот не сакале да ги коментираат информациите, изјави нивниот претставник за Ројтерс, додавајќи дека ја поддржуваат Universal.
Кампањата на Трамп не одговориле на барањето за коментар.
Неколку уметници или нивни претставници се спротивставија нивната музика да се свири на митинзите на Трамп во последниве години, вклучително и починатиот американски пејач и гитарист Том Пети, британската пејачка Адел, рок бендот R.E.M., канадската пејачка Селин Дион, како и песните на починатата ирска пејачка Шинеад О’Конор.
