Украинскиот претседател Володимир Зеленски не сакаше да потврди дали нападот врз магацинот за оружје во руската област Брјанск бил извршен со американски ракети ATACMS, но рече дека Украина има капацитети со долг дострел и дека тие ќе бидат искористени.
Тој го соопшти ова за време на заедничката прес-конференција со премиерката на Данска, Мете Фредриксен, вчера во Киев, цитиран од Укринформ.
– Нема непотребни детали. Украина има можности со долг дострел, има беспилотни летала со долг дострел од сопствено производство, сега имаме Neptun со долг дострел, и не само еден. Имаме и ATACMS. Сето тоа ќе го искористиме – рече Зеленски како одговор на барањето на новинарот да потврди дека нападот на магацинот за оружје кај Брјанск бил извршен со американска ракета ATACMS.
Зеленски ги повика светските лидери да воведат санкции против руската флота на танкери.
– За сите нас во Европа и светот, од суштинско значење е нашите партнери да ја поддржат потребата да се изврши притисок врз флотата на танкери во сенка. Тоа е алатка која (рускиот претседател Владимир Путин) ја користи за финансирање на агресија во Украина и дестабилизација на другите региони во светот – рече украинскиот лидер.
Според него, учеството на севернокорејската армија во војната против Украина на страната на Русија не треба да се игнорира.
– Сега руската армија користи 11.000 севернокорејски војници. Може да има многу повеќе, освен ако нема светска реакција која би го уништила самиот обид на Северна Кореја да интервенира. Во спротивно, нивните војници и платеници ќе ги видиме во други воени зони – смета Зеленски.
Тој потврди дека е во процес на воспоставување контакти со тимот на новоизбраниот американски претседател Доналд Трамп, како и информации за патувањето на шефот на кабинетот на претседателот Андрије Јермак во САД.
Да потсетиме, откако светските медиуми во неделата објавија дека САД ја овластиле Украина да користи крстосувачки ракети со долг дострел ATACMS за удари длабоко на територијата на Русија, руското Министерство за одбрана во вторникот објави дека украинските вооружени сили извршиле напад со шест ATACMS проектили претходната ноќ во Брјанска област.
The post Се огласи Зеленски по нападот на рускиот арсенал кај Брјанск со американски ракети ATACMS appeared first on Локално.
