Премиерот на Грузија, Иракли Кобахиџе, денеска на брифинг со новинарите го објави новиот состав на владата, а за министрка за надворешни работи ја предложи претседателката на Комисијата за евроинтеграции, Мака Бочоришвили.
Таа на таа функција ќе го наследи Илија Дарчијашвили.
На чело на Министерството за правда е именуван Анри Оханашвили, претседател на парламентарната Комисија за правни прашања, а Давит Сонгулашвили, претседател на Комисијата за секторска економија и економски развој, ќе раководи со Министерството за животна средина и земјоделство.
Номинациите беа објавени непосредно пред првата седница на парламентот, која е закажана за 12 часот по локално време, а ќе се одржи во заднина на протести и проблеми со легитимноста на новиот парламент поради резултатите од одржаните парламентарни избори на 26 октомври, за кои опозицијата тврди дека биле наместени, пренесува порталот „Цивил Џорџија“.
Со инаугуративната седница на грузискиот парламент ќе претседава најстариот пратеник, Ладо Кахадзе. Клучните точки на дневниот ред се потврдување на мандатот на сите 150 члена и избор на претседател на Собранието, потпретседател и претседател на управниот одбор.
Според официјалните резултати на Централната изборна комисија, во парламентот влегоа пет политички партии, а владејачката партија Грузиски сон има 89 мандати.
Текстот Премиерот на Грузија ги смени министерот за надворешни работи и уште двајца членови на кабинетот е превземен од МАКФАКС.
