Репрезентацијата на Шпанија во големото финале во Берлин ја совладаа Англија со 2:1 и со тоа повторно станаа европски шампиони, а досега не се знаеше дека само неколку часа претходно германската полиција спречила терористички напад.
Најтиражниот британски таблоид „Сан“ откри дека специјалните сили на германската полиција упаднале во становите на три сомнителни лица, кои сакале директно да ја нападнат фан зоната на Англија во берлинскиот Брајтшајдплац и со тоа да ги загрозат животите на неколку илјади луѓе.
За среќа, тие беа уапсени благодарение на брзата полициска акција, па никогаш нема да дознаеме колкав хаос можеше да предизвика нивниот план.
-Тие лица од претходно и беа познати на полицијата како поддржувачи на Исламската држава и беа следени – изјави портпаролот на берлинската полиција.
Инаку, на истото место каде што беше планиран нападот на денот на финалето на ЕП 2024, во 2016 година, џихадисти влегоа со камион на божиќниот пазар, при што загинаа 12 лица, а 56 беа повредени.
