Пожарот што избувна вчера над градот Пехчево, е ставен под контрола, а за негово целосно гаснење утрово вклучени се и три хеликоптери, изјави градоначалникот на Пехчево Александар Китански. Тој нагласи дека напорите за справување со огнената стихија траеле и во текот на ноќта, целата ноќ имало дежурни екипи на терен, а состанок одржал и Кризниот штаб при што постигната е координација за денешните активности на терен.
Во гасењето на пожарот вклучени се и луѓе доброволци од повеќе градови како и од месното население. Проценува дека има над 150 луѓе кои се на терен, а помагаат и од неколку доброволни друштва. Очекуваат помош и од специјалните сили од Скопје, а апелираат на помош и од граѓаните од околните населени места.
Поради алармантната состојба со пожарот во околината на Пехчево, од синоќа е отворен пункт за донирање вода и храна за пожарникарите кои учествуваат во гаснењето на пожарот. Пунктот се наоѓа во Домот на културата во Пехчево, а апелот на надлежните е сите коишто се во можност можат да донираат, се со цел да им се даде поддршка на учесниците во неговото гаснење.
The post Пожарот над Пехчево ставен под контрола appeared first on Локално.
