Блок 1 на РЕК „Битола“ околу 12 часот прекина со работа поради испад на 110-киловолтен далновод на АД МЕПСО.
Редовното и нормално функционирање на Блок 1 беше прекинато бидејќи во критичниот момент постројката не можеше да ја испорача произведената електрична енергија кон македонскиот електроенергетски систем по што во согласност со сигурносните протоколи блокот беше исклучен, велат надлежните.
Според известувањето, прекинот во снабдувањето со електрична енергија во неколку населби во Битола во истиот период кога без напон остана и Блок 1 на РЕК „Битола“ се должи на истиот проблем предизвикан од далноводот на МЕПСО и нема никаква поврзаност со работата на комбинатот.
Паралелно, како што додаваaт, без проблеми се одвива производството на електрична енергија од Блок 2 на РЕК „Битола“ бидејќи постројката е поврзана со електропреносниот систем на АД МЕПСО преку друг, 400-киловолтен далновод. На Блок 3 во тек се ремонтни активности.
Денешниот испад на Блок 1 на РЕК „Битола“, поради проблеми во преносната мрежа на АД МЕПСО, е трет во период од 40-ина дена. Стручни лица од РЕК „Битола“ работат на надминување на состојбата и повторно ставање во функција на Блок 1.
Текстот Нов испад на Блок 1 на РЕК „Битола“ поради проблеми во системот на МЕПСО е превземен од МАКФАКС.
