Екипата на Армани Милано, за која настапува македонскиот репрезентативец Ненад Димитријевиќ, е на дното на табелата во Евролигата со само една победа по пет одиграни натпревари.
Италијанскиот тим пред неколку дена претрпе пораз на домашен терен од екипата на Анадолу Ефес, а еден од главните виновници, барем според тренерот на „манекените“ – Еторе Месина, е токму нашиот интернационалец, кој мечот го заврши без ниту еден поен, со само една асистенција за 13 минути минати на терен.
- Тој има проблеми на сите позиции. И офанзивно и дефанзивно. Тој е во голем проблем бидејќи ова е повисоко ниво, мојата работа, но и работата на тимот е да му помогнеме. Неговата работа е да нема изговори во неговата глава, мора да направи чекор напред, истакна Месина, па додаде:
- Постои прашање на сила и конкурентност на двете страни на теренот. Мислам дека шутираше четири слободни фрлања на пет натпревари во Евролигата. Во лигата е поинаку, а ние мораме да му помогнеме. И тој ќе мора сам да си помогне, додаде трофејниот кошаркарски стручњак.
Инаку, Димитријевиќ во досегашниот дел од сезоната бележи во просек по нешто повеќе од седум поени по натпревар, како и по пет скокови и исто толку асистенции во рамки на Евролигата. Но, она што најмногу загрижува е тоа што на последниот меч како воопшто да не беше присутен, каде успеа да оствари само една асистенција за 13 минути на терен.
