Македонскиот премиер Христијан Мицкоски денеска се сретна со претседателот на Република Србија, Александар Вучиќ во Белград. Констатирано дека двете држави немаат отворени прашања, а односите се базираат на меѓусебно почитување и пријателство.
-Мора да создаваме мостови за економска и политичка соработка со сите соседи и да градиме иднина за нашите граѓани, објави премиерот Мицкоски на социјалните мрежи.
Мицкоски ја предводи македонската делегација на меѓународниот саем „Винска визија на Отворен Балкан“. Шефот на владата ќе има средба и со српскиот колега Вучевиќ.
– Со претседателот на Владата на Република Северна Македонија Христијан Мицкоски за зајакнување на односите и заеднички иницијативи за постабилна иднина на нашите граѓани. Разговаравме за економски и инфраструктурни проекти, со посебен акцент на изградбата на пругата Будимпешта-Белград-Скопје-Атина-Пиреја, која би ги поврзала јужна и централна Европа, како и за подобрување на трговската размена и соработка во областа на енергетиката, пишува на официјалниот Инстаграм профил на претседателот на Србија.
Тој посочи дека се согласиле дека солидарноста и меѓусебната поддршка се клучни за стабилноста и развојот на целиот регион.
– Особено сум благодарен за фактот што Северна Македонија е еден од клучните партнери во иницијативата Отворен Балкан, која стана симбол на силна регионална соработка и поврзување на Западен Балкан. Нашата заедничка цел е подобра иднина за сите граѓани, а соработката преку иницијативата Отворен Балкан и други проекти останува цврста основа врз која ја градиме иднината на целиот регион. Убеден сум дека во иднина ќе ги развиваме односите во духот на пријателството и партнерството – заклучи Вучиќ.
The post Мицкоски се сретна со Вучиќ: „Наша заедничка цел е подобра иднина за сите граѓани“ appeared first on Локално.
