Два „ер-тактори“ со четири членови на екипажот со уште пет лица за копнена поддршка од Република Кипар ќе учествуваат во гаснењето на пожарите во Општините Свети Николе и Чашка, како дел од помошта за нашата држава од ЕУ механизмот за цивилна заштита, информираат грчките медиуми.
Од Секторот за шумарство при Министерство за земјоделство, рурален развој и животна средина на Република Кипар соопштија дека „по наредба на директорот на конкретниот сектор Савва Иезекил и по консултација со надлежната министерка Мариа Панајоту, преку Механизмот за цивилна заштита на Европската Унија се испраќа помош за Република Северна Македонија за справување со шумските пожари во областите Чашка и Свети Николе“, а соодветно бил информиран и министерот за надворешни работи на Кипар Константинос Комбос.
Авионите, како што информира тамошното министерство, се опремени со соодветна опрема за полнење гориво и употреба на пена, како и со соодветна телекомуникациска опрема, односно за комуникација со Единицата за медиуми за летање во Ларнака, така и за пренос на информации и фотографски материјал.
Во моментов, гори на шест места во Македонија. Екипите на терен, хеликоптери од воздух веќе еден месец се обидуваат да ги стават пожарите под контрола.
The post Кипар ќе ни помогне во гасење на пожарите со два „ер-трактори“ appeared first on Локално.
