Александар Ристовски – Принц е роден на 24 ноември 1974 година во Скопје. Првото појавување на Александар Ристовски било во почетокот на деведесеттите, кога во рамките на својата човек-група Принц Александар и со провокативниот изглед и песните ја шокирал јавноста. Од тој период му остана и прекарот – Принц, денес негов заштитен знак.
Следуваа групите Виктор, Викторија, Орлова вода, Д-р ФАНКенштајн, длабоко инспирирани од љубовта и изгледот на светската мегаѕвезда Принс. Меѓутоа самите песни на Принц до 1997 година, откако неговата текстопишувачка кариера ја доживеала својата експанзија, во јавноста не предизвикале речиси никаков интерес. Меѓутоа, здружувајќи ги силите со талентираниот композитор Дарко Димитров во подготовка на материјали за други изведувачи и групи (пред се за Ребека и за Нокаут), и Принц и неговите песни обрнаа на себе повеќе внимание по што се стекнаа и со вистинска популарност.
Меѓу најпознатите песни на Принц напишани за други (од тоа време) се издвојуваат: Обиди се и Сама за Ребека, ЕјБиСи, Бум, Дождот, Би се викал те сакам, Хај-Фај, Временска машина, Фатална опсесија… на Нокаут, Љубовта и Ако останеш на Искра Трпева, Слепец на Маја Вукичевиќ, Минско поле, Во афект, Во боја и Блиц афера за ТНТ, Светлина за Дексо, Само за тебе, Милениум со тебе и За нас за Каролина Гочева, Флерт за Скандал, Јави се за Бум, Ме исфрлаш од колосек и Точка, нов ред на Ексклузив… За себе, пак, Принц ги осмисли и ги напиша: Монструмот во мене, И, Скандал, Туше, Кич…
Од октомври 1999 година и неговата соло-кариера доживува вистински процут по што тој интензивно почна да го најавува својот деби-албум Вијагра, на кој, според првичната верзија требаа да се најдат 35 песни. Меѓутоа, дојде до промена на планот, па кон крајот на зимата и во почетокот на раната пролет 2002. година, без некоја претерана помпа, Принц го промовира своето првенче Супериорен, на кој се најдоа 15 стари и нови песни, меѓу кои и: Сања Лазања, Кажи ми, Седи, не ме знаеш, Гладијатор, Супериорен… Со ангажманите за своето првенче, во речиси двегодишниот период, Принц ги продолжи и ангажманите врзани за своето естетско видео-презентирање во јавноста. Одтаму е и забележителен успехот на спотовите за Сања Лазања, Фројд е жив (дует со радио и тв-водителката Марија Каева), Рифреш и Кажи ми, Седи, не ме знаеш…
Александар Ристовски – Принц, во многу нешто пионер на македонската музичка сцена, кон крајот на 1999. година ја објави книгата Забава до бесвест, каде се сместени голем број негови текстови наменети за домашни групи и исполнители. Оваа стихозбирка е првото македонско издание на естрадна поезија.
Од крајот на 2002 година, Принц е во брак со модниот творец Розе Трајческа.
Среќен роденден Принц ти посакува редакцијата на Екран.
The post Денес роденден прославува нашиот познат композитор, текстописец, аранжер и мултиинструменталист Александар Ристовски – Принц appeared first on ekran.
