Грузиската владејачка партија, Грузиски сон го избра поранешниот фудбалер Михаил Кавелашвили за свој претседателски кандидат на изборите на 14 декември.
Претседателката Саломе Зурабашвили беше избранa со народно гласање, но Грузија оттогаш ги одобри уставните измени со кои се укина директниот избор на претседателот и го замени со гласање од 300-члениот изборен колегиниум, составен од членови на парламентот, општинските совети и регионалните законодавни тела.
Грузиски сон има мнозинство во избирачкиот колегиниумот, што ја прави речиси сигурна победата на Кавелашвили.
„Нашето општество е поделено“, рече Кавелашвили во парламентот, обвинувајќи дека радикализацијата и поларизацијата во земјата се поттикнати од странство. Тој ја обвини Зурабашвили за кршење на уставот и изјави дека ќе ја врати претседателската функција во уставните рамки. Грузиски сон победи на изборите на 26 октомври, но опозицијата прогласи бојкот на парламентот откако изјави дека гласањето било нерегуларно, под влијание на Русија, која сака да ја задржи Грузија во својата орбита.
Европските набљудувачи оценија дека гласањето се одвивало во атмосфера обележана со случаи на поткуп, двојно гласање и физичко насилство.
Критичарите ја обвинуваат Грузиски сон, основан од прорускиот милијардер Биџина Иванишвили, дека станува се поавторитарен и се приклонува кон Москва. Партијата неодамна усвои закони слични на оние што ги користи Кремљ за потиснување на слободата на говорот и правата на ЛГБТК+.
ЕУ го суспендираше процесот за членство на Грузија на неодредено време во јуни, откако парламентот усвои закон сличен на рускиот закон што се користи за дискредитација на организации кои ја критикуваат владата. Кавелашвили беше еден од авторите на законот.
Иванишвили денеска во парламентот ја претстави кандидатурата на Кавелашвили, пофалувајќи го неговиот „значаен придонес во заштитата на националните интереси на Грузија и зајакнувањето на суверенитетот на земјата“.
Кавелашвили играше во Премиер лигата за Манчестер Сити и во уште неколку клубови од швајцарската Суперлига. Тој влезе во парламентот во 2016 година како член на Грузиски сон. Во 2022 година, стана ко-основач на политичкото движење Народна моќ, кое стана познато по својата силна антизападна реторика.
The post Владејачката партија во Грузија за претседателски кандидат избра поранешен фудбалер на Манчестер Сити appeared first on Локално.
