Украинските одбранбени сили првпат ноќеска ја погодија руската територија со балистички ракети ATACMS. Целта беше успешно погодена, изјави за РБЦ-Украина информиран извор од одбранбените сили.
Според изворот, цел на нападот бил воен објект во близина на градот Карачев во областа Брјанск.
„Навистина, првпат употребивме ATACMS за да ја нападнеме руската територија.
Ноќта на 19 ноември беше нападнат 67-миот арсенал на Главната ракетна и артилериска дирекција на руското Министерство за одбрана. Снимките на социјалните мрежи покажаа силни пожари на местото.
Овој воен објект веќе бил мета и претходно. Во октомври, украински беспилотни летала ја погодија оваа локација. Генералштабот на вооружените сили на Украина изјави дека таквите удари му создаваат логистички проблеми на непријателот и го намалуваат нивниот офанзивен потенцијал.
Денеска, Генералштабот исто така извести за удар на објект кај Карачев, но не го прецизираше оружјето што е употребено, а во официјалното соопштение не се појави ниту споменување на ATACMS. По ударот, во складиштето за муниција биле забележани 12 секундарни експлозии и детонации.
„Уништувањето на складиштата со муниција за руската окупаторска армија за да се стави крај на руската вооружена агресија против Украина ќе продолжи“, коментираат од украинскиот Генералштаб.
Текстот ВИДЕО: Украина првпат употреби американски ракети ATACMS за напад на руска територија е превземен од А1он.
