Претседателот на Стопанската комора, Бранко Азески, очекува дека ќе се најде решение во интерес на бизнисот, за каматата и провизиите за унгарскиот кредит наменет за компаниите, на состанокот меѓу Владата и банките, кој ќе се одржи в недела, во Министерството за финансии.
Иако не е поканет на состанокот, како што вели, оптимист е дека ќе се најде решение и апелира тоа да оди во пакет со прашањето за капитализацијата на Македонската банка за поддршка на развојот, затоа што таква институција е потребна за бизнисот. Доколку го поканат на состанокот, подготвен е да оди.
– Досега не сум поканет, а има време да ме поканат. Кога се работи за интересите на бизнисот, на полноќ да ми јават, ќе станам и ќе одам, и во недела. Го следам процесот како и сите заинтересирани луѓе и јас го изнесов мојот став во колумна. Може да се коментира тој и вака и така, но ние, бизнисмените, не можеме да се согласиме, односно да содејствуваме во една состојба во која имаш пари на сметката, а не знаеш што да правиш со нив. Значи, еден ден да седат, за нас, тоа е изгубено време. Мислам дека е време да се разреши тоа прашање и дека имаат капацитет, и Владата и банките, да го разрешат тоа прашање. И се надеваме дека ќе биде тоа во интерес на фирмите, бидејќи овие средства се наменети токму за нив – рече Азески во одговор на новинарско прашање, по потпишувањето договор за соработка со „Транспаренси интернешнл“ – Македонија.
На таков начин, додаде, ќе му се помогне на стопанството да го преброди периодот до почетокот на следната година, кога имаме сериозна обврска за враќање на обврзницата, за која се резервирани пари и нема да се подјадуваат капиталните инвестиции или други со ребаланс на буџетот, туку ќе се искористат за развој на бизнисот.
Прашан колкава банкарска провизија бараат банките за заемот, рече дека не знае, но додаде дека ако е каматата 3,25 проценти, не може да се земе некоја баснословна сума за провизија.
– Се знае колку е провизијата во однос на каматата. Така што, тоа ќе биде во рамките на очекувањата на бизнисот. Бизнисот има потреба од пари, секогаш за инвестиции и, од она што го знаеме од анкетите, ќе има инвестициски програми, кои чекаат на реализација. Заеднички, банките со намалување на своите редовни каматни стапки за инвестициски активности и државата со оваа помош, треба да помогнат бизнисот да направи чекор и да не се срамиме веќе од бројките од 1,8 проценти раст на БДП, туку да се дигне како што е предвидено на 3-4 отсто за да можеме да бидеме во рамноправна трка со сите. Вака, со просек што е на ниско ниво, 30 години практично ја загрозуваме иднината на нашите деца и не можеме да го спречиме процесот на иселување – потенцира Азески.
Тврдам, посочи, дека банките во делот на бизнисот се со најпрофесионална структура, а Владата има голема одговорност, сега, на почетокот од мандатот, да направи добар потег.
– Така што мислам дека бизнисот овој пат ќе ќари, нема каде да се оди, едните треба постојано да се докажуваат, другите се на почеток на мандатот, а ние сме тие што треба да ги искористиме тие средства на најадекватен начин. Тоа значи и понатаму извозот да остане приоритет број еден, со тоа да се подобрат продуктивноста и иновативноста и на тој начин можеме да создадеме додадена вредност со која ќе ги враќаме долговите што ги направил некој пред нас – порача Азески.
На барање од премиерот Христијан Мицкоски, в недела, во Министерството за финансии ќе се одржи состанок со банките за одредување на трошоците што ќе треба да ги платат фирмите за префрлање на парите од унгарскиот заем наменет за поддршка на компаниите.
