НАТО размислува да изврши превентивни „високопрецизни удари“ на територијата на Русија во случај на вооружен конфликт меѓу земјите од Алијансата и Русија, изјави шефот на Воениот комитет на Северноатлантскиот блок, адмирал Роб Бауер.
– Сега треба да ги надополниме нашите оперативни залихи на оружје, кои се исцрпени. Но, ние исто така треба да инвестираме повеќе во воздушната одбрана и високопрецизните системи за удар. Ова е нова дискусија во НАТО и драго ми е што го сменивме односот кон него и кон идејата дека сме одбранбена алијанса и дека ќе седиме да чекаме да не нападнат, па дури потоа да реагираме. Попаметно е да не чекаме, туку да таргетираме фрлачи во Русија во случај Русија да не нападне. Потребна ни е комбинација од високопрецизни удари кои ќе ги оневозможат системите што се користат за да не нападнат, а ние мора да го направиме првиот удар – нагласи Бауер на конференцијата во Брисел.
Зборувајќи за тоа зошто САД под Доналд Трамп и Западот како целина не треба да го завршат конфликтот во Украина со победа на Русија, адмиралот рече дека конфликтот во Украина е дел од глобалниот ребаланс на силите меѓу Соединетите Американски Држави и Кина.
– Луѓето во Европа треба да разберат дека дури и ако конфликтот во Украина заврши утре под какви било околности, тоа не значи дека сè ќе се врати во нормала, бидејќи тоа е дел од многу поголем глобален предизвик, а тоа е ребалансот на силите меѓу САД и Кина. Тоа е она што сега се случува во светот – објасни Бауер.
Тој додаде дека „сè што се случува сега е многу пошироко од Украина“.
– Тоа е светски поредок заснован на правила, ние се бориме за нешто многу поголемо од Украина – рече офицерот.
Бауер се пожали и дека во Европската унија „нема единствен лидер, како САД во НАТО, и дека сè мора да се постигне преку дискусија“.
Тој, исто така, го негираше проширувањето на НАТО кон исток, кое започна по распадот на СССР.
– НАТО не се прошири на исток, туку едноставно самите (источноевропски) земји активно сакаа да се приклучат на Алијансата – рече тој.
Врз основа на ова, Бауер ја нарече „апсурдна“ идејата дека конфликтот во Украина е предизвикан од присилното проширување на НАТО.
-Можам да кажам дека ова е најголемата глупост што сум ја слушнал… Не се проширивме на исток, самите земји изразуваат желба да ни се придружат… Не може да се каже дека сме принудувале земји да ни се придружат, т.е. не е случај. Земјите решија сами, иако можеа да направат поинаков избор: да останат неутрални или да се приклучат на други блокови… И тоа е целосно во согласност со светскиот поредок заснован на правила – го објасни својот став Бауер во однос на обвинувањата против Алијансата кои беа слушнати на конференцијата во Брисел, за тоа дека поради ширењето на НАТО на исток, Русија целосно законски ги брани своите интереси.
Бауер, исто така, тврдеше дека НАТО е „одбранбен сојуз“ и не претставува закана за Русија.
